Бир қатор кучли терма жамоалар иштирок этаётган "Копа Америка" турнири гуруҳ босқич ўйинлари давом этмоқда ва унда тобора кўп нарса ойдинлашиб бормоқда. Якунланган 4 тур ҳам бизга бир қатор қизиқарли баҳсларни тақдим этди. Сермаҳсуллик бобида ҳам ушбу тур қолганларидан ажралиб турди. Демак, бугун ва кеча бўлиб ўтган барча ўйинларга тўҳталиб ўтамиз.
"А" гуруҳи
Эквадор - Перу 2-2
Ушбу гуруҳда 4-тур анчагина қизғин курашларга бой бўлди. Илк ўйинда Эквадор терма жамоси Перуга қарши майдонга тушди. Ўйиннинг 23-дақиқасида Перу футболчиси Ренато Тапиа ўз дарвозасини ишғол этиб қўйди. Биринчи бўлимга қўшиб берилган дақиқаларда эса Айртон Пресьядо гол уриб, Эквадор 2-0 ҳисобида танаффусга чиқиб кетишини таъминлаб берди. Иккинчи бўлимни Перу анчагина ҳужумкор бошлади ва 48 дақиқада Жанлука Лападула ҳисобни қисқартиришга муваффақ бўлди. Бироз ўтиб, яъни 54-дақиқада Андре Карилльо гол уриб мувозанатни тиклади. Шундай қилиб, 2-2 ҳисоби ўйин якунигача сақланиб қолди.
Бразилия - Колумбия 2-1
Ушбу гуруҳнинг ва турнинг марказий ўйинларидан бири бу Бразилия Колумбия учрашуви эди. Ўйиннинг 10- дақиқасида колумбиялик Луис Фернандо Диас ўзининг супер зарбаси билан ҳисобни очиб берди. Шундан сўнг, бразилияликлар тинимсиз ҳужумлар уюштиришди, аммо ҳужумлар самарасиз якунланар эди. 78-дақиқа ўтиб бораётган бир пайтда ниҳоят Фирмино гол уриб, ҳисобни тенглаштирди. Ўйинга қўшиб берилган вақтда яьни 100-дақиқада Каземиро гол урди ва Бразилия ғалабани илиб кетди. Драмматик баҳсда "пентакампеонлар" ўз ҳисобига навбатдаги очколарни ёзиб қўйиб, кейинги босқичга биринчи ўринда чиқиш масаласини ҳал қилди.
"B" гуруҳи
Боливия - Уругвай 0-2
Иккинчи гуруҳдан ўрин олган учрашувлар ҳам анчагина қизиқарли ва кутилмаган натижани бизга тақдим этди. Уругвай ҳамда Боливия терма жамоалари ўртасидаги учрашувнинг 40-дақиқасида боливиялик Хайро Кинтерос ўз дарвозасини ишғол этиб қўйди. 79-дақиқада эса Уругвай терма жамоасининг тажрибали ҳужумчиси Эдинсон Кавани ҳисобни 2-0 кўринишига келтириб қўйди ва улар ўз ҳисобига 3 очкони ёздириб қўйишди.
Парагвай - Чили 2-0
Ушбу гуруҳдан ўрин олган иккинчи баҳсда бироз кутилмаган натижа қайд этилди. 33-дақиқада Брайан Самудио ўйинда ҳисобни очиб берди. Иккинчи бўлимнинг 58-дақиқасида эса Мигель Альмирон Парагвайнинг иккинчи голига муаллифлик қилди ва ўйинда бошқа ҳисоб ўзгармади. Ушбу ғалабадан сўнг парагвайликлар муҳим 3 очкони қўлга киритиб, кейинги босқичга чиқиш масаласини ҳал этди.
