Mart oyidan buyon Coca-Cola Superligada 12 ta tur uchrashuvlari va O‘zbekiston kubogida guruh bosqichi o‘yinlari ortda qoldi. Hozirgacha eng ko‘p rasmiy uchrashuvda AGMK ishtirok etdi — 19 ta uchrashuv (xalqaro maydondagi 7 ta o‘yinni ham qo‘shib hisoblaganda).

Paxtakor va Nasafda bu ko‘rsatkich 18 tani tashkil qiladi. Qolgan klublar 15 tadan o‘yinda maydonga tushdi.

Mavsum so‘ngida bu ko‘rsatkich AGMK klubida 34-37 tani, Paxtakorda 33-36 tani, Nasafda esa 34-40 tani tashkil qilishi mumkin. Bunda Qarshi klubining O‘zbekiston kubogi va OFK kubogida qaysi bosqichgacha yetib borishi ahamiyat kasb etadi.

Paxtakor va AGMK Chempionlar ligasida qo‘shimcha 6 tadan o‘yin o‘tkazayotgan bir vaqtda, bir o‘zimizning klublar uchun O‘zbekiston kubogi guruh bosqichi orqali yana minimum 3 tadan o‘yinni kafolatladik. Ya’ni, xalqaro maydonda ishtirok etmagan Superliga klubi mavsum davomida 29-33 ta atrofida rasmiy o‘yinda ishtirok etishi mumkin. Pandemiya sabab Liga kubogi musobaqasini tashkil etishning imkoni bo‘lmadi.

Milliy terma jamoa sharafini himoya qiluvchi Paxtakor, Nasaf yoki AGMK futbolchisi yil davomida tahminan 34-45 rasmiy o‘yinda maydonga tushish imkoniyatiga ega bo‘lishi mumkin. Yevropalik stabil futbolchilarda esa bu ko‘rsatkich 40-60 tani tashkil etadi. Albatta Yevropa davlatlari masofa masalasida osiyochalik qiyinchilikka ega emas. Ularda hatto transport tizimi ham juda yaxshi rivojlangan. Ammo bizda ichki imkoniyatlarimizdan kelib chiqib ham, sekin-asta futbolchi uchun jismoniy yuklamalarni oshirib borish imkoniyati mavjud.