Март ойидан буён Coca-Cola Суперлигада 12 та тур учрашувлари ва Ўзбекистон кубогида гуруҳ босқичи ўйинлари ортда қолди. Ҳозиргача энг кўп расмий учрашувда АГМК иштирок этди — 19 та учрашув (халқаро майдондаги 7 та ўйинни ҳам қўшиб ҳисоблаганда).

Пахтакор ва Насафда бу кўрсаткич 18 тани ташкил қилади. Қолган клублар 15 тадан ўйинда майдонга тушди.

Мавсум сўнгида бу кўрсаткич АГМК клубида 34-37 тани, Пахтакорда 33-36 тани, Насафда эса 34-40 тани ташкил қилиши мумкин. Бунда Қарши клубининг Ўзбекистон кубоги ва ОФК кубогида қайси босқичгача етиб бориши аҳамият касб этади.

Пахтакор ва АГМК Чемпионлар лигасида қўшимча 6 тадан ўйин ўтказаётган бир вақтда, бир ўзимизнинг клублар учун Ўзбекистон кубоги гуруҳ босқичи орқали яна минимум 3 тадан ўйинни кафолатладик. Яъни, халқаро майдонда иштирок этмаган Суперлига клуби мавсум давомида 29-33 та атрофида расмий ўйинда иштирок этиши мумкин. Пандемия сабаб Лига кубоги мусобақасини ташкил этишнинг имкони бўлмади.

Миллий терма жамоа шарафини ҳимоя қилувчи Пахтакор, Насаф ёки АГМК футболчиси йил давомида таҳминан 34-45 расмий ўйинда майдонга тушиш имкониятига эга бўлиши мумкин. Европалик стабил футболчиларда эса бу кўрсаткич 40-60 тани ташкил этади. Албатта Европа давлатлари масофа масаласида осиёчалик қийинчиликка эга эмас. Уларда ҳатто транспорт тизими ҳам жуда яхши ривожланган. Аммо бизда ички имкониятларимиздан келиб чиқиб ҳам, секин-аста футболчи учун жисмоний юкламаларни ошириб бориш имконияти мавжуд.