O‘runovdan «Ferensvarosh»ga rad javobi.
«Spartak» (Moskva) yarim himoyachisi Oston O‘runov faoliyatini Vengriya chempioni - «Ferensvarosh»da davom ettirishi mumkin edi. Ma’lum qilinishicha, vengriyaliklar hamyurtimiz transferini keyinchalik to‘liq xarid qilish sharti bilan ijara asosida olishni istaganlar. Biroq futbolchining o‘zi bu klubga o‘tishni istamadi. Ta’kidlanishicha, Ostonni «Ferensvarosh» taklif qilgan maosh miqdori qoniqtirmagan.
Kenjaboyev va «Cheju» yo‘llari ayro.
Janubiy Koreya OAV xabariga qaraganda, «Cheju Yunayted» klubi hamyurtimiz Islom Kenjaboyev bilan o‘rtadagi shartnomani bekor qildi. «Nasaf»ning sobiq vingeri Janubiy Koreya jamoasi safiga 2020 yilning dekabrida qo‘shilgandi. 21 yoshli futbolchi yangi jamoasining «K»-1 liga doirasidagi 1tagina o‘yinida maydonga tushdi. Yaqinda yurtimizga qaytgan yarim himoyachi faoliyatini «Qizilqum»da davom ettiradi. Navoiy klubi murabbiylarining shampionat.asia saytiga ma’lum qilishlaricha, Kenjaboyev yaqin kunlarda PFLda ro‘yxatdan o‘tkazilishi mumkin.
Akobir To‘rayev chakki emas.
Hujumchi Akobir To‘rayev Tojikiston chempionatining iyun oyidagi eng yaxshi futbolchisi sifatida tan olindi. Xo‘jandning «Esxata» klubi sharafini himoya qilayotgan hamyurtimiz yakunlangan oy raqiblar darvozasini 3 marta ishg‘ol qilib, chempionatdagi jami gollari sonini 8taga yetkazib qo‘ydi. Murabbiylar orasida esa «Istiqlol» (Dushanbe) ustozi Vitaliy Levchenko tengsiz bo‘ldi. Tojikistonda oy laureatlariga futbol ligasi diplomlari va 3 ming somon miqdorida mukofot puli berilishini aytish joiz. Eslatma, 2012 yili Eronda o‘tkazilgan U-16 toifasidagi Osiyo chempionatida O‘zbekiston o‘smirlar termasi safida chempion bo‘lgan Akobir To‘rayev bunga qadar «Buxoro», «Paxtakor», «Raxmatgoj» (Bangladesh), «Mash’al» jamoalarida o‘ynashga ulgurgan.
51 daqiqa harakat.
«Aktobe» Qozog‘iston Premyer-ligasi 19-turida «Akjayik»ni qabul qilib, irodali g‘alabaga erishdi - 2:1. Jamoa hujumchisi Igor Sergeev bu safar ham boshlang‘ich tarkibda maydonga tushib, 51-daqiqagacha harakatlandi.
BATE ochko yo‘qotdi.
Belarus chempionati Oliy ligasi peshqadami «Shaxtyor»ni izma-iz ta’qib etayotgan BATE 15-turda «Vitebsk» mehmoni bo‘lib, qimmatli 2 ochkodan mahrum bo‘ldi - 0:0. Borisov jamoasining yarim himoyachisi Shahboz Umarov mazkur uchrashuvning 72-daqiqasigacha maydonda to‘p surdi.
Doston Hamdamov ortga qaytadimi?
Yarim mavsumBAA chempionatida to‘p surgan Doston Hamdamov «Paxtakor»ga qaytsa, ajabmas. O‘zbekiston milliy jamoasi yarim himoyachisi hozirda xorij klublari takliflarini ko‘rib chiqmoqda. Bordiyu, ular Dostonga ma’qul kelmasa, u Superliga ikkinchi davrasidan e’tiboran yana «sherlar» sharafini himoya qilishi mumkin.
Masharipov «Al-Nasr» ixtiyorida.
Hamyurtimiz Jaloliddin Masharipov ijara safaridan keyin Saudiya Arabistonining «Al-Nasr» klubi ixtiyoriga qaytdi. Bu haqda Ar-Riyod klubi rasmiy xabar e’lon qildi: «O‘zbekiston futboli yulduzi Jaloliddin Masharipov ertaga Ar-Riyodga qaytadi va jamoa bilan Bolgariyada tashkillashtiriladigan o‘quv-mashg‘ulotlar yig‘iniga yo‘l oladi». Eslatish kerak, Jaloliddin avvalgi mavsum ijara kelishuvi asosida «Shabab Al-Ahli» (BAA) sharafini himoya qildi.
