Daniya bosh murabbiyi Kasper Yulmand Angliya bilan muvaffaqiyatsiz o‘yindan so‘ng intervyu berdi. Daniyaliklar 1:2 hisobida yutqazib, Yevropa chempionati finaliga chiqa olmadilar. Daniya tarkibida yagona golni Mikkel Damsgor urdi.
“Yigitlar ajoyib o‘yin ko‘rsatishdi. Raqib chindan ham kuchli jamoa. Ushbu Yevroda biz hujumkor o‘yin qildik, ko‘plab gollar urdik, uslubimizga sodiq qoldik. Angliya bilan o‘yinda biz qo‘limizdan kelgan barcha ishni qildik, maydonda bor kuchimizni berib o‘ynadik. Biroq ma’lum holatlar Daniyaning yana bir qadam tashlashiga to‘sqinlik qildi ", - deya UYEFA rasmiy sayti murabbiyning so‘zlarini keltiradi.
