Tokio olimpiadasining dzyudo bahslari hozircha biz uchun omadsiz kelmoqda. Bugun ikki nafar hamyurtimiz o‘z ishtirokini ilk saralash bosqichidayoq yakunlashga majbur bo‘ldi.

66 kg. vaznda Sardor Nurillayev moldovalik Denis Viyeruga qarshi gilamga chiqdi. Bellashuvning asosiy vaqtida hisob ochilmadi. "Golden Score" esa 7 daqiqayu 12 soniya davom etdi. Kurash davomida Sardorning burni qonagani uchun unga 4 marta tibbiy yordam ko‘rsatildi. Yakunda esa jarohat tufayli bahs to‘xtatildi va moldovalik dzyudochiga g‘alaba taqdim etildi.

Ayollar o‘rtasida 52 kg. vaznda olimpiya o‘yinlariga borgan Diyora Keldiyorovaga ilk bosqichda kuchli raqib to‘g‘ri keldi. Mo‘g‘ulistonlik Sosorbaram Lxagvasuren bir yarim daqiqa ichida ippon bahosi bilan bahsni o‘z foydasiga hal qildi.