Rustam Zabirov murabbiyligidagi “Bunyodkor-2004” yozgi o‘quv-yig‘in mashg‘ulotlarini Tojikistonda o‘tkazdi.

Toshkent shahar U-18 Birinchiligining ikkinchi davra o‘yinlariga tayyorgarlik ko‘rayotgan “qaldirg‘ochlar” qo‘shni davlatdagi o‘quv-yig‘in mashg‘ulotlarida ikkita nazorat uchrashuvida ham maydonga tushdi. Kuniga ikki mahaldan shug‘ullangan tarbiyalanuvchilarimiz asosan jismoniy yuklamalar bo‘yicha mashg‘ulot o‘tkazdi. Rustam Zabirov boshchiligidagi murabbiylar shtabi ertalabki mashg‘ulotlarda futbolchilarga jismoniy yuklamalar bergan bo‘lsa, tushdan so‘ng texnik-taktik tayyorgarlikka e’tibor qaratildi.

Ta’kidlaganimizdek, 10 kunlik yig‘in davomida ikkita nazorat o‘yini o‘tkazildi. Birinchi raqib Xo‘jand shahrining “Esxat” jamoasi o‘rinbosarlari bo‘ldi. Uchta gol urilgan bellashuvda Rahmat Rahimovning dubli “qaldirg‘ochlar”ning g‘alabasini ta’minladi. Ikkinchi bahsda “Istravshan” jamoasi o‘rinbosarlari bilan durang o‘ynagan tarbiyalanuvchilarimiz Tojikistondan mag‘lub bo‘lmay qaytishdi. Ikkinchi o‘yinda Nizom Farhodov gol muallifiga aylandi.