Yaponiyaning Tokio shahri mezbonlik qilayotgan Olimpiya o‘yinlarida o‘zbekistonlik sportchilar 4 avgust kungi chiqishlarini yakunladi. Natijalar bilan tanishtirib o‘tamiz.

Kanoeda eshkak eshish

Nilufar Zokirova va Dilnoza Rahmatova 200 metr masofaga kechgan bahslarning chorak finalida ishtirok etdi. Zokirova o‘z guruhida 48.995 soniya qayd etib, oltinchi o‘rinni oldi. Rahmatova esa 46.645 soniya bilan uchinchi bo‘ldi. Shu tariqa o‘zbekistonlik sportchilar yakkalik bahslarida yarim final yo‘llanmasiga ega chiqolmadi.

Erkin kurash

-86 kg vazn toifasida O‘zbekiston sharafini himoya qilgan Javrail Shapiyev 1/8 finalda Rio—2016 Olimpiadasi g‘olibi va ikki karra jahon chempioni eronlik Hasan Yazdaga qarshi bahs yuritdi. Unda fors sportchisi g‘alaba qozonib, keyingi bosqichga chiqdi.

G‘ulomjon Abdullayev (-57 kg) dastlabki bosqichda xitoylik Minghu Lyuni mag‘lub etgan holda chorak finalga yo‘l oldi. Yarim final uchun kechgan bahsda Abdullayev ikki karra jahon chempioni rossiyalik Zaur Uguyevga qarshi gilamga chiqdi. G‘ulomjon bahsning so‘nggi soniyalarida raqibiga ochko boy berib qo‘ydi va yarim final yo‘llanmasidan quruq qoldi.

Yakunda Yazda va Uguyev final yo‘llanmasiga ega chiqdi. Shu tariqa o‘zbekistonlik kurashchilar Shapiyev va Abdullayev 5 avgust kuni bronza uchun kechadigan bahslarda ishtirok etish imkoniyatiga ega bo‘ldi.

Boks

Bahodir Jalolov (+91 kg) yarim finalda britaniyalik Freyzer Klarkka qarshi bahs olib bordi. Bahodir jang davomida o‘z ustunligini namoyish qildi va yakunda g‘alaba qozonib, finalga chiqdi. Finalda uni qozog‘istonlik nomdor bokschini mag‘lub etgan Richard Torresga qarshi jang kutib turibdi. Bahodir Torres bilan 2019 yilgi Jahon chempionatida to‘qnash kelgan va uni chuqur nokaut holatiga tushirib qo‘ygandi. Ular o‘rtasidagi final bahsi 8 avgust kuni bo‘lib o‘tadi.