Tokio olimpiadasida yengil atletikaning yettikurash turida ishtirok etayotgan Yekaterina Voronina oltinchi yo‘nalish — nayza uloqtirish mashqini bajardi.

Hamyurtimizning 3ta urinishdan eng yaxshi natijasi 49,88 metrga teng bo‘ldi. Ma’lumot o‘rnida: Voroninaning ushbu yo‘nalishdagi shaxsiy rekordi va joriy mavsumdagi eng yaxshi natijasi 53 metrdan uzoqroqni tashkil qilayotgan edi. Ammo olimpiada o‘zining eng yaxshi natijalariga unchalik yaqin kela olmadi.

Shunga qaramay, Yekaterina nayza uloqtirishdagi mashqi uchun 858 ball to‘pladi hamda umumiy ochkolarini 5329 ballga yetkazdi. Bu orqali u birdaniga 7 pog‘ona ko‘tarilib, sportchilar orasida 12-pog‘onaga chiqib oldi.

Qayd etish joiz, musobaqa davomida peshqadamlar sarasida ketayotgan niderlandiyalik Nadin Brorsen, britaniyalik Katerin Jonson-Topson, Burkina-Faso vakilasi Marte Koala turli dasturlarda ishtirokni yakunlay olmasdan medallar uchun kurashni erta tark etishdi.

Yettikurashchilar kechki dasturda so‘nggi yo‘nalish — 800 metrga yugurish bo‘yicha musobaqada ishtirok etishadi va shunday so‘ng sovrindorlar nomi aniq bo‘ladi.

Hozircha belgiyalik Nafissatu Tiam 5912 ball bilan peshqadam bo‘lib turibdi. Niderlandiyalik Anouk Vetter (5848) va AQSHlik Kendel Uilyams (5642) kuchli uchlikka kirishgan.