Italiyaning «Roma» klubi bosh murabbiyi Joze Mourinyo yangi mavsumdan kutayotgan natijalari haqida gapirdi.
Portugaliyalik mutaxassis muxlislarni rimliklarning dastlabki muvaffaqiyatlariga erishishdan oldin sabr-toqatli bo‘lishga chaqirdi.
«Roma» — buyuk klub. Ko‘rsatkichlari bo‘yicha men ishlagan boshqa klublar darajasiga mos keladi. Ammo bu jamoadagi loyihalarimiz bir oz boshqacha. «Chelsi», «Inter» yoki «Real»ga kelganimda, maqsad aniq edi — dastlabki kundan boshlab g‘alaba qozonish. Ammo «Roma»da vaziyat boshqacha, jamoa anchadan buyon hech narsa qo‘lga kiritmagan. O‘tgan mavsumda «Roma» chempiondan 29 ochko va to‘rtinchi o‘rinni egallagan jamoadan 16 ochko ortda qoldi.
Rahbariyatga ko‘proq futbolchi sotib olish uchun bosim o‘tkazishga haqqim yo‘q. Jamoamizda mavjud futbolchilar bilan ishlashim kerak. Lekin transfer bozorida ba’zi o‘yinchilarni sotib olishga hali vaqtimiz bor», — dedi Mourinyo.
