Италиянинг «Рома» клуби бош мураббийи Жозе Моуриньо янги мавсумдан кутаётган натижалари ҳақида гапирди.

Португалиялик мутахассис мухлисларни римликларнинг дастлабки муваффақиятларига эришишдан олдин сабр-тоқатли бўлишга чақирди.

«Рома» — буюк клуб. Кўрсаткичлари бўйича мен ишлаган бошқа клублар даражасига мос келади. Аммо бу жамоадаги лойиҳаларимиз бир оз бошқача. «Челси», «Интер» ёки «Реал»га келганимда, мақсад аниқ эди — дастлабки кундан бошлаб ғалаба қозониш. Аммо «Рома»да вазият бошқача, жамоа анчадан буён ҳеч нарса қўлга киритмаган. Ўтган мавсумда «Рома» чемпиондан 29 очко ва тўртинчи ўринни эгаллаган жамоадан 16 очко ортда қолди.

Раҳбариятга кўпроқ футболчи сотиб олиш учун босим ўтказишга ҳаққим йўқ. Жамоамизда мавжуд футболчилар билан ишлашим керак. Лекин трансфер бозорида баъзи ўйинчиларни сотиб олишга ҳали вақтимиз бор», — деди Моуриньо.