19-22 avgust kunlari Toshkent shahrida zamonaviy beshkurashning ikkikurash, uchkurash va to‘rtkurash yo‘nalishlari bo‘yicha O‘zbekiston chempionati bo‘lib o‘tdi. Unda Toshkent shahri, Andijon, Qashqadaryo, Toshkent va Surxondaryo viloyatlaridan 120 nafar sportchi ishtirok etdi.
20 avgust kuni U-11, U-13, U-15 yosh toifasida 65 nafar boshlang‘ich sportchilar ikkikurashning suzish va yugurish yo‘nalishlari bo‘yicha qatnashdi.
21 avgust kuni uchkurashning suzish va lazer-ran (lazer to‘pponchasidan o‘q otishni o‘z ichiga olgan yugurish) yo‘nalishlari bo‘yicha 55 nafar tajribali sportchilar musobaqalashdi.
22 avgust kuni qilichbozlik bo‘yicha musobaqalar o‘tkazilib, unda 17 nafar eng kuchli sportchilar mahoratini namoyon qilishdi.
Taqdirlash marosimida O‘zbekiston zamonaviy beshkurash federasiyasi raisi Bahromjon Gaziyev, O‘zbekiston Respublikasi Milliy gvardiyasi Toshkent shahar boshqarmasi boshlig‘i polkovnik Atamurod Ahmedov hamda qishki va murakkab texnik sport turlari bo‘yicha ROSMM direktori Azimjon Yusupov faxriy mehmon sifatida ishtirok etib, g‘olib va sovrindorlarga mukofotlarni topshirishdi.
