Namanganlik futbol muxlislarining bir jihatiga tan bermay ilojimiz yo‘q. Ular stadionga qaytishni istab, na PFL va na viloyat hokimiyatini tinch qo‘yadi. Talabchanlik yuqori darajada. Bugun viloyat hokimining birinchi o‘rinbosaridan ham shu masalada xat keldi. Viloyatdagi karantin bilan bog‘liq vaziyatni ular bizdan yaxshiroq biladi, shuningdek, mas’uliyat, xavfsizlik, tartib kabi masalalarni o‘z zimmalariga olishga tayyor. Bu albatta yoqimli jihat.

Gap kelganida bir jihatni aytish kerak. Tarkib yoki tajriba bobida "Navbahor" futbol klubi bugun "Paxtakor" bilan raqobat qila olmasligi mumkin. Ammo aynan muxlislar bu ikki jamoa o‘rtasida shunday muhitni vujudga keltirishdiki, qolgan masalalar ikkinchi darajaga chiqdi, maydonda asosan teng kurash ko‘rishga odatlandik.

O‘z vaqtida "Paxtakor" — "Neftchi", "Paxtakor" — "Bunyodkor", "Paxtakor" — "Lokomotiv" kabi klassik qarama-qarshiliklarni ko‘rganmiz. Bugun tan olish kerak, "Paxtakor" — "Navbahor" o‘yini TOP darajada. Uning arafasida va undan keyin hech kimga tinchlik yo‘q. Aslida mana shunday atmosfera chempionatni rivojlantiradi.

Diyor Imomxo‘jayev.