Наманганлик футбол мухлисларининг бир жиҳатига тан бермай иложимиз йўқ. Улар стадионга қайтишни истаб, на ПФЛ ва на вилоят ҳокимиятини тинч қўяди. Талабчанлик юқори даражада. Бугун вилоят ҳокимининг биринчи ўринбосаридан ҳам шу масалада хат келди. Вилоятдаги карантин билан боғлиқ вазиятни улар биздан яхшироқ билади, шунингдек, масъулият, хавфсизлик, тартиб каби масалаларни ўз зиммаларига олишга тайёр. Бу албатта ёқимли жиҳат.

Гап келганида бир жиҳатни айтиш керак. Таркиб ёки тажриба бобида "Навбаҳор" футбол клуби бугун "Пахтакор" билан рақобат қила олмаслиги мумкин. Аммо айнан мухлислар бу икки жамоа ўртасида шундай муҳитни вужудга келтиришдики, қолган масалалар иккинчи даражага чиқди, майдонда асосан тенг кураш кўришга одатландик.

Ўз вақтида "Пахтакор" — "Нефтчи", "Пахтакор" — "Бунёдкор", "Пахтакор" — "Локомотив" каби классик қарама-қаршиликларни кўрганмиз. Бугун тан олиш керак, "Пахтакор" — "Навбаҳор" ўйини ТОП даражада. Унинг арафасида ва ундан кейин ҳеч кимга тинчлик йўқ. Аслида мана шундай атмосфера чемпионатни ривожлантиради.

Диёр Имомхўжаев.