AGMK bosh murabbiyi Mirjalol Qosimov Superliganing 18-turi doirasida bo‘lib o‘tgan "Turon"ga qarshi o‘yin (2:0) borasida o‘z fikrini bildirib o‘tdi.

«G‘alabasiz seriyamizdan so‘ng bugun muxlislarni xursand etish va kerakli ochkolarni jamg‘arib olishni maqsad qilib, bugungi o‘yinga jiddiy tayyorgarlik ko‘rgandik. O‘tgan uchrashuvga nisbatan tarkibda qator rotasiyalarga qo‘l urdik. Imkon boricha, barcha futbolchilarga doimiy imkoniyat bermoqdamiz. O‘ylaymanki, bugun yaxshi o‘yin namoyish etib, haqli ravishda g‘alaba qozondik. Ayni paytda chempionatda oson o‘yinlar qolmagan. Musobaqa jadvali yuqorida sovrinli o‘rinlar uchun kurash keskin kechmoqda. Turnir jadvalining quyida ham har bir jamoa ochko uchun qattiq bellashmoqda. Igor Shkvirin boshqaruvidagi «Turon» ham yaxshi jamoa. Ularga kelgusi o‘yinlarda omad tilayman.

Bizni buyog‘iga ham yanada jiddiy o‘yinlar kutmoqda. Kerakli ochkolarni jamg‘arish kerak. AGMK kelasi o‘yinlarda ham faqat g‘alaba uchun maydonga tushib, muxlislarini xursand qilishga astoydil harakat qiladi. Bugungi g‘alabani bizni doimo qo‘llab-quvvatlaydigan ishqibozlarimizga bag‘ishlaymiz», — dedi Qosimov.