Norvegiyaning Oslo shahrida tennis bo‘yicha norasmiy jahon chempionati hisoblangan Devis kubogining jahon guruhi birinchi bosqichidan o‘rin olgan Norvegiya va O‘zbekiston terma jamoalari o‘rtasidagi uchrashuv yakunlandi.
Kecha, 18 sentyabr kuni ushbu juftlik doirasida ikkita uchrashuv bo‘lib o‘tdi. Avvaliga Denis Istomin va Sanjar Fayziyev juftligi Kasper Ruud hamda Viktor Durasovich tandemini 7/6, 6/4 hisoblarida mag‘lub etib, hisobni qisqartirgan edi — 2:1.
Biroq, to‘rtinchi hal qiluvchi bahsda tajriba o‘z so‘zini aytdi. ATP reytingida 567-pog‘onadan joy olgan o‘zbekistonlik Sanjar Fayziyev dunyoning 10-raketkasi bo‘lib turgan Kasper Ruudga 3/6, 1/6 hisoblarida imkoniyatni boy berdi. Bu bilan terma jamoalar o‘rtasidagi so‘nggi uchrashuv – Humoyun Sultonov va Viktor Durasovich bahsining o‘tkazilishiga hojat qolmadi. Shu tariqa, O‘zbekiston “Devis Kubogi”dagi yurishini yakunladi.













