Madridning «Real» klubi kelasi mavsumdan boshlab «Shtutgart» bosh murabbiyi Sebastyan Xyonesni jamoa tepasiga olib kelish variantini ko‘rib chiqmoqda. Bu haqda Bild nashri xabar berdi.
Manbaga ko‘ra, Chempionlar ligasidan chiqib ketish va Ispaniya chempionatida «Barselona»dan ortda qolish klub rahbariyatiga katta bosim olib kelmoqda. Shu sababli «Real» yangi murabbiy izlash jarayonini boshlagan. Xyones esa asosiy nomzodlardan biri sifatida ko‘rilmoqda.
Mutaxassisning o‘yin uslubi hamda «Shtutgart» tarkibida bir qator futbolchilar sotilganiga qaramay erishilgan natijalar «qaymoqranglilar» rahbariyatida ijobiy taassurot qoldirgan.
Sebastyan Xyonesning amaldagi shartnomasi 2028 yil 30 iyunigacha mo‘ljallangan. U 2023 yildan buyon «Shtutgart»ni boshqarib kelmoqda va uning qo‘l ostida jamoa 2024/2025 mavsumda Germaniya Kubogini qo‘lga kiritgan.













