Мадриднинг «Реал» клуби келаси мавсумдан бошлаб «Штутгарт» бош мураббийи Себастьян Хёнесни жамоа тепасига олиб келиш вариантини кўриб чиқмоқда. Бу ҳақда Bild нашри хабар берди.
Манбага кўра, Чемпионлар лигасидан чиқиб кетиш ва Испания чемпионатида «Барселона»дан ортда қолиш клуб раҳбариятига катта босим олиб келмоқда. Шу сабабли «Реал» янги мураббий излаш жараёнини бошлаган. Хёнес эса асосий номзодлардан бири сифатида кўрилмоқда.
Мутахассиснинг ўйин услуби ҳамда «Штутгарт» таркибида бир қатор футболчилар сотилганига қарамай эришилган натижалар «қаймоқранглилар» раҳбариятида ижобий таассурот қолдирган.
Себастьян Хёнеснинг амалдаги шартномаси 2028 йил 30 июнигача мўлжалланган. У 2023 йилдан буён «Штутгарт»ни бошқариб келмоқда ва унинг қўл остида жамоа 2024/2025 мавсумда Германия Кубогини қўлга киритган.













