Pro Liga bahslarining 19-turidan o‘rin olgan «Neftchi» - «Olimpik» (3:2) bahsi yakunidan so‘ng toshkentliklar murabbiyi Timur Kapadze o‘z fikrlari bilan o‘rtoqlashdi.

"Bugun albatta «Neftchi»ni g‘alaba bilan tabriklayman. Juda qiziq o‘yin bo‘ldi. Muxlislar ham maza qildi deb o‘ylayman. Uchrashuv kurashlarga boy bo‘ldi. Futbolchilarim yaxshi harakat qildi, biroq maydon biroz pand berdi. Biz asosan paslar bilan o‘ynaymiz, bu maydonda esa bunday o‘yin ko‘rsatishga qiynaldik. «Neftchi»ga esa bu qo‘l keldi. Raqib safida baquvvat legioner futbolchilar bor, ular uzoq uzatmalarda yaxshi harakat qilishdi. Gollarda o‘zimiz xatoga yo‘l qo‘ydik. Bolalar shunday o‘yinlar orqali ancha yaxshi tajribaga ega bo‘ladi. O‘yinda yaxshi harakat qilgan vaziyatlar ham bo‘ldi.

Jiyanov jarohat oldi, shu sababli o‘zgarish qildik. Ko‘rgan bo‘lsangiz raqib futbolchilari ancha qo‘pol harakat qilishdi. Nafaqat «Neftchi», balki qolgan jamoalar qo‘pol o‘ynashmoqda. Hakamlar esa bunga yo‘l qo‘ymoqda. Bu esa yomon. Bugungi uchrashuvda jarohat sababli 3 ta o‘zgarish qilishga majbur bo‘ldik", — dedi Kapadze.