Xabaringiz bor, uzoq besh yil kutilgan Tokio-2020 Olimpiya o‘yinlari joriy yilning iyul-avgust va Paralimpiya o‘yinlari avgust-sentyabr oylarida bo‘lib o‘tdi.
O‘yinlar davomida O‘zbekiston sport delegasiyalari a’zolari musobaqadan oldin va musobaqa davrida o‘rnatilgan tartibda qon va peshobdan doping-sinamalar topshirishdi.
Ta’kidlash joizki, galdagi Olimpiada va Paralimpiada musobaqadan oldin olingan doping-sinamalar soni avvalgi o‘yinlarga nisbatan sezilarli darajada ko‘p bo‘lib, buning asosiy maqsadi bevosita musobaqalarga imkon qadar toza, dopingdan xoli sportchilarni qo‘yish orqali sog‘lom raqobat hamda sportda yuqori darajali shaffoflikni ta’minlash edi va natijaga erishildi.
O‘zbekistonlik Olimpiya spotchilardan jami 16 ta doping-sinama olinib, ulardan 11 tasi musobaqadan oldin va 5 tasi musobaqa davriga to‘g‘ri keldi. Paralimpiya sportchilarimizdan esa jami 39 ta doping-sinama olindi, ulardan 21 tasi musobaqadan oldin va 18 tasi musobaqa davriga to‘g‘ri keldi.
Musobaqadan oldin olingan tezkor doping-sinamalarning barchasida taqiqlangan moddalar aniqlanmaganligi bois sportchilarimiz bahslarda ishtirok etishdi. Musobaqa davomida medal va sovrinli o‘rinlarga sazovor bo‘lgan hamda rekord o‘rnatgan sportchilarimiz doping-tekshiruvidan o‘tishdi. Odatda ular tezkor tahlil qilinmasligi uchun ularning natijalari o‘yinlardan keyin vaqt o‘tgach, belgilangan muddatlarda ma’lum bo‘ladi.
Milliy antidoping agentligi
