Avval xabar berganimizdek, Iordaniya qirolligida bo‘lib o‘tayotgan gandbol bo‘yicha ayollar o‘rtasidagi Osiyo chempionati bugun o‘z nihoyasiga yetadi.

Bundan biroz avval 5-o‘rin uchun kechgan bahs yakunlanib, shu yilning dekabr oyida Ispaniyada bo‘lib o‘tadigan Jahon chempionatiga Osiyo qi’asidan yo‘l olgan so‘nggi jamoa nomi ma’lum bo‘ldi. Quvonarlisi, ana shu baxtli jamoa O‘zbekiston ayollar terma jamoasidir.

Bosh murabbiy Zinaida Penkova shogirdlari 5-o‘rin uchun kechgan bahsda Gonkong termasiga qarshi maydonga tushdi. Ma’lumki, bu ikki jamoa guruh bosqichida ham o‘zaro to‘qnash kelishgan va o‘shanda omad gonkonglik gandbolchi xotin-qizlarga nasib etgandi – 30:27.

Bu safar ayollarimiz ana shu mag‘lubiyat uchun revansh olish barobarida mundial yo‘llanmasiga ham ega chiqishdi. Uchrashuv 28:25 hisobida hamyurtlarimiz foydasiga hal bo‘ldi. Shu tariqa ayollar terma jamoamiz O‘zbekiston tarixida ikkinchi marta JCHda ishtirok etish huquqini qo‘lga kiritdi. Bungacha Osiyodan JCH yo‘llanmalariga Yaponiya, Janubiy Koreya, Qozog‘iston va Eron sazovor bo‘lishgan edi.

Turizm va sport vazirligi
Matbuot xizmati