Italiya chempionatining 6-turidan o‘rin olgan markaziy bahs – Rim derbisida “Lasio” “Roma”ni 3:2 hisobida mag‘lub etishga muvaffaq bo‘ldi.

“Bo‘rilar” safida Eldor Shomurodov o‘yinga 64-daqiqada zaxiradan qo‘shildi.

Natijada “Lasio” ochkolari sonini 11 taga yetkazib, 6-o‘ringa ko‘tarilib oldi. 12 ochkoga ega “Roma” esa 4-pog‘onada qoldi.

Eldor Shomurodov maydondan tashqarida ham g‘oliblik uchun kurashdi. O‘tgan haftada OFK tomonidan “Haftaning eng yaxshi osiyolik futbolchisi” so‘rovnomasi o‘tkazilgan bo‘lib, yakshanba kuni nihoyasiga yetgan ovoz berish yakunlariga ko‘ra, Eldor jami ovozlarning 29,69 foiziga ega chiqib 2-o‘rinni egalladi.

“Portu” klubi va Eron milliy jamoasi forvardi Mehdi Taremi esa 42,26 foiz ovoz bilan OFK tomonidan haftaning osiyolik eng yaxshi o‘yinchisi, deb topildi.