Futbolda qahramonlar bormi? 90 daqiqalik o‘yinda o‘z jamoasi g‘alabasi uchun harakat qilgan va buni uddasidan chiqqan har bir futbolchi qahramon aslida. Futbol afsonalari aynan shuning uchun, har bir o‘yindagi harakatlari uchun, afsona nomiga munosib bo‘lishgan, nazdimda. Lekin, ba’zi bir figuralar uchun bunday an’ana-yu qonunlar ishlamaydi, sizga aytsam.
"Barcha davrlarning eng yaxshi futbolchisi" bo‘lmish ana shunday bir daho borki, har qanday o‘zi qatnashmagan futbol uchrashuvlari qahramoni bo‘la oladi. Fahmlaganingizdek, bu Zlatan! O‘zining ta’biri bilan aytganda, inglizlar futbolni 1863 yilda Ibra uchun o‘ylab topishgan. O‘yini sifati bilan birgalikda mana shunday "iqtiboslar"i futbol muxlislari uchun yaxshigina tanish. Keling, yaqinda futboldagi debutiga 21-yil to‘lgan (1999-yil, 3-oktyabr) "terminator"ning yaqin yillardagi bir nechta jiddiy hazillarini eslaymiz.
Qariganida ham "quyulmagan" Zlatan 2020 yili "Milan" ga qaytganida jurnalistning "Eng yaxshi futbolchi bilan raqobatlashishga tayyormisiz" degan savoliga "Messi qachon A Seriaga keldi" deb javob bergan. Boshqa futbolchilarga nisbatan ochiqdan ochiq hurmatsizlik qilishi Zlatandan boshqasiga yarashmasa kerak-a?
Nima uchun unda Oltin to‘pi va jahon chempionati kubogi yo‘qligini so‘rashganda esa "Eng zo‘ri ekanligimni bilish uchun sovrish shart emas" deb javob qaytargandi. Shuningdek, sevgilisiga bergan eng katta sovg‘asi o‘zi ekanligini ham ta’kidlab o‘tgandi.
"Mensiz o‘tadigan Jahon chempionati? Menimcha buni tomosha qilishning qizig‘i yo‘q". Mourinyocha fe’lga ega futbolchidan shu va shunga o‘xshash gaplar deyari barcha u qatnashgan matbuot anjumanlarida bo‘ladi. Bu ba’zan odamni g‘ashini keltirsa, ba’zan kayfiyat olib keladi.
"Los-Anjelos Geleksi" dagi so‘nggi intervyularidan birida Ibra shunday degandi: "Keldim, ko‘rdim, zabt etdim, ketdim. Arzimaydi. Siz Zlatanni istadingiz, men keldim. Haqiqiy Zlatanni his qildingiz. Endi bemalol beysbolingizni ko‘ravering". Zlatandan chiqayotgani uchun har doimgidek qabul qilingandi bu so‘zlar. Ha, u shunday - hech qachon mag‘lubiyatni tan olmaydigan, har qanday holatda o‘zini bir necha qadam oldinda deb hisoblaydigan, balkim quvnoq, shubhasiz afsonaviy fubolchi.
Zlatanning futbol atrofidagi "dohiyona" fikrlari uchun ancha muncha qoralamalar kerak, aslida hozir bir nechtasini esga oldik, xalos. Nima bo‘lganda ham hamon yuqori sport formadagi, hamon jarima maydonidagi eng xavfli, shuning bilan birga kibrsiz bo‘lsa "o‘ziga o‘xshmaydigan" Zlatan Ibragimovich futbol afsonasi ekanligini aynan shu sifatlari bilan isbotlab bo‘lgan.
