"Real" yarim himoyachisi Eduardo Kamavinga Fransiya yoshlar terma jamoasi bazasini tark etib, Madridga qaytdi.
U La liganing 8-turi doirasida bo‘lib o‘tgan «Espanyol»ga qarshi o‘yinda olgan jarohatidan to‘liq forig‘ bo‘lib ulgurmadi. Futbolchining chap oyog‘i panjasida kuchli qontalash yuzaga kelgan. Shu sababli u og‘riqni his qilmoqda.
Endi Kamavinga "Madrid" tibbiyot shtabi nazorati ostida bo‘ladi. Aslida ushbu jarohat u qadar jiddiy emas. Ammo chapaqay bo‘lgan futbolchining to‘p bilan muomalada bo‘ladigan oyog‘i bezovta qilayotgani uchun hozircha u maydonga tusha olmaydi.
"Real" uchun yaxshi tomoni shundaki, La liga "Qirollik klubi"ning "Atletik" bilan bo‘ladigan bahsini boshqa muddatga qoldirgan (Janubiy amerikalik legionerlar terma jamoalar safida kech qaytishadi). Jamoa navbatdagi bahsni 19 oktyabr kuni Chempionlar ligasi doirasida «Shaxtyor»ga qarshi o‘tkazadi. Bu uchrashuv esa Anchelotti jamoasi uchun muhim hisoblanadi. Shundan so‘ng esa "Real"ni 24 oktyabr kuni "el-klasiko" kutib turibdi.