“Nasaf” – "Metallurg" uchrashuvidan keyin o‘tkazilgan matbuot anjumanida dastavval mehmonlar jamoasi bosh murabbiyi yordamchisi Artyom Petrosyan o‘yin haqida fikrlarini bildirdi.

— Birinchi navbatda, yigitlarga rahmat aytmoqchiman. Ikkinchi taymda 10 kishi bo‘lib qolganimizga qaramasdan, oxirigacha kurashishdi. Penaltidan gol urolmadik, lekin bu — futbol, shunaqasi ham bo‘lib turadi.

"Nasaf" – tezkor va yaxshi tarkibga ega jamoa. Standartlarda e’tiborni yo‘qotganimiz uchun gol o‘tkazib yubordik. Jamoamiz futbolchilariga ikkinchi bo‘limdagi harakatlari uchun tashakkur.

— Darvozabon yaxshi harakat qildi...
— Darvozabonning vazifasi o‘zi shu, u qutqarishi kerak. Ikkita uchta qiyin vaziyatda Tursunboyev zo‘r o‘ynadi va jamoamiz joniga ora kirdi.

— "Metallurg" o‘tgan yilga qaraganda yomonroq o‘ynamoqda. Bu nima bilan bog‘liq?
— Buni hozir tushuntirib berolmayman, bu uzoq vaqtni talab qiladi. O‘ylaymanki, o‘tgan yilgi yetakchilarning jamoani tark etgani ta’sir qildi.