Angliyaning to‘rtinchi divizioni doirasida "Leyton Oriyent" klubi o‘z maydonida "Xartlpul Yunayted"ni qabul qildi. Uchrashuvda hakam tomonidan qo‘pol va kulgili xatoga yo‘l qo‘yildi.

Bahsning 40-daqiqasida bosh hakam Alan Yang yordamchi hakamga qo‘shilishi kerak bo‘lgan vaqtga ishora qildi va yordamchi hakam "4" raqami yozilgan tabloni ko‘tardi. O‘sha paytda u 40 va 45-daqiqalarni almashtirib yuborgandi.

Bahsning 45-daqiqasiga kelganda esa referi taym yakunlangani haqidagi hushtakni chaldi. O‘sha paytda hakamga xato qilganini tushuntirishga urinishdi, ammo u murojaatlarni rad qildi.

Tanaffusda esa hakam xatoga yo‘l qo‘yganini tushunib yetdi. Jamoalar maydonga qaytayotganida Yang futbolchilarga xato tufayli birinchi bo‘lim kam o‘ynalganini aytib, ikkinchi bo‘lim boshlanishidan avval birinchi taymning o‘sha qolib ketgan 4 daqiqasini o‘ynab qo‘yish kerakligini ta’kidladi. Jamoalar birinchi bo‘limdagi maydon tomonlarini egallashdi va istar-istamas 240 soniyani o‘ynab qo‘yishdi.

Shundan so‘ng klublar darvozalarni almashtirishdi va ikkinchi taymni o‘tkazishdi. Uchrashuvda mezbonlar 5:0 hisobida g‘alaba qozonishdi.