Bugun Toshkent vaqti bilan 20:15da Ispaniyadagi Vigo shahrida mezbon “Selta“ jamoasi Kataloniyadan tashrif buyurgan “Barselona“ jamoasini qabul qiladi. Ko‘rinishidan mehmonlar yaqqol favoritdek. Aslida esa mezbonlarda ham g‘alaba uchun yetarli imkon bor. Stdion.uz hozir shu bahs haqida batafsil to‘xtalib o‘tishga qaror qildi.
“Selta Vigo“
Ayni paytda, vigoliklar holatiga havas qilib bo‘lmaydi. “Havoranglar“ La Liga turnir jadvalida 15-o‘rinda ketishmoqda. Chempionatda eng kam gol urgan (10ta gol) 3-jamoa bo‘lib turibdi. So‘nggi 5 o‘yinning faqat bittasida g‘alaba qozongan. Biroq shunga qaramay, bu jamoa “Barselona“ uchun noqulay raqib hisoblanadi. Chempionat doirasidagi oxirgi 10ta bahsning 7tasida vigoliklar raqibidan ochko tortib olishga muvaffaq bo‘lishgan (3 g‘alaba, 4 durang). E’tiborlisi, bu jamoalar o‘rtasidagi bahslarda albatta gol bo‘ladi. 0:0 hisobida yakunlangan uchrashuvlar deyarli yo‘q. Oxirgi o‘zaro 5 o‘yinga nazar solamiz. Umumiy hisobda 17ta (10tasi “Barsa“niki, 7tasi “Selta“niki) gol urilgan. Bu shuni anglatadiki, har o‘yinda muxlislar kamida 2ta gol guvohi bo‘lishadi.
Yuqoridagi raqamlar mezbonlar ham anoyilardan emasligini anglatgan holda, bu jamoalar o‘rtasidagi uchrashuvlar doim qiziqarli va gollarga boy bo‘lishiga isbot bo‘la oladi.
“Barselona“
Bu to‘qnashuvda nom va obro‘ jihatidan mehmonlarning og‘ir “tosh bosish“i ajablanarli holat emas. Bu borada “ko‘k-anorranglilar“ butun dunyoda yetakchilardan biri hisoblanadi. Biroq hozirgi holatga qarab baho beradigan bo‘lsak, “Barselona“ni yaqqol favorit deb ko‘rsatish juda to‘g‘ri bo‘lavermaydi. Chunki ayni paytda, klub natijalarida beqarorlik hukm surmoqda. Shu sabab murabbiy o‘zgarmoqda. Yangi murabbiyga darrov moslashish ham oson emas. Ustiga ustak, ko‘p o‘yinchilar jarohat olgan. Jamoaga ijobiy ta’sir qilishi mumkin bo‘lgan yagona jihat – Xavining bosh murabbiy etib tayinlangani bo‘lishi mumkin. Futbolchilar yangi murabbiyga o‘zlarini ko‘rsatish uchun ham g‘alaba uchun borlarini berib o‘ynashadi. Chiroyli va tartibli harakatlanishga urinishadi. Zero, ularning kelajagi yangi murabbiyning tanloviga bog‘liq.
Shunday ekan, ikki jamoa uchun ham bu uchrashuv muhim ahamiyatga ega. Vigoliklar “xavfli hudud“dan uzoqlashishi kerak bo‘lsa, kataloniyaliklar "yuqori uchlik"ka ko‘tarilmog‘i darkor.
“Selta"ga oid yangiliklar
Jamoa tarkibida Santi Mina va Brais Mendes jarohat olishgan va katta ehtimol bilan bugungi uchrashuvda o‘z klublariga yordam bera olishmaydi. Shuningdek, Ugo Malyoning ham maydonga tushishi so‘roq ostida bo‘lib turibdi.
“Barselona“ga oid yangiliklar
Yuqorida aytib o‘tganimizdek, “blaugranas“ safida lazaretdagilar soni me’yoridan oshib ketgan. Serxio Aguero, Martin Breytuyeyt, Pedri, Usmon Dembele, Serjinyo Dest, Jerar Pike bugun maydon tashqarisidan o‘yinni kuzatishadi. Bu ham yetmagandek, Serxi Roberto va Kleman Langlening ham Vigodagi bahsda ishtirok etishi noma’lumligicha qolmoqda.
Taxminiy tarkiblar
“Selta Vigo“ - Dituro; Vaskes, Aydu, Murilyo, Galan; Tapiya, Servi, Suares, Nolito; Solari, Aspas.
“Barselona“ - Ter-Stegen; Mingesa, Garsiya, Arauxo, Alba; Gavi, Buskets, de Yong; Fati, Depay, Koutinyo.
