Xabaringiz bor, shu kunlarda nogiron-amputantlar o‘rtasida futbol bo‘yicha O‘zbekiston chempionatining bahslari o‘tkazildi. Unda yurtimizning turli hududlaridan kelgan 7 ta jamoa g‘oliblik uchun kurash olib bordi.
Turnirning yakuniy jadvalida Toshkentning “Matonat” jamoasi birinchilikni qo‘lga kiritdi. “Baynalminal” (Toshkent) hamda Jizzax viloyati jamoasi esa kuchli uchlikdan joy oldi.
Musobaqaning yopilish hamda g‘olib va sovrindorlarni taqdirlash marosimida O‘FA birinchi vise-prezidenti Ravshan Ermatov, Bosh kotib Avaz Maksumov, musobaqa tashkilotchisi va bosh shifokori Rustam Mehmanov, shuningdek, faxriylar, futbol jamoatchiligi va OAV vakillari ishtirok etishdi. Turnirning g‘olib va sovrindorlarga esdalik sovg‘alari topshirildi.