«Dinamo» - «Neftchi» uchrashuvi va Pro liga futbol mavsumining bayramona yopilish marosimiga marhamat!

Hakim Fuzaylov murabbiyligida «Dinamo» jamoasi Pro ligada muddatdan avval 2-o‘rinni naqd qilib, ikki yillik tanaffusdan so‘ng Superligaga yo‘llanma oldi.

2021 yilgi Pro liganing so‘nggi turi doirasida 21 noyabr, yakshanba kuni soat 15:00da Samarqandda «Dinamo» jamoasi Farg‘onaning «Neftchi» klubini qabul qiladi. Superliga yo‘llanmasiga ega chiqib ulgurgan bu klublar o‘rtasidagi bahsda «Dinamo» jamoasi Farg‘onadagi mag‘lubiyat uchun «Neftchi»dan revansh olish va mavsumning yopilish marosimi oldidan muxlislarga bayramona muhitni taqdim etish imkoniyatiga ega.

Samarqand va Farg‘ona klublari o‘rtasidagi o‘yin oldidan «Dinamo» jamoasining Superligaga yo‘llanma olgani munosabati bilan «Dinamo» markaziy stadionida muxlislarga konsert dasturi taqdim etiladi. 21 noyabr, yakshanba kuni soat 14:00dan stadionda san’atkorlar ishtirokida chiqishlar rejalashtirilgan. Shu kuni Pro liga futbol mavsumining yopilishi marosimi yuqori darajada o‘tkazilib, o‘yindan keyin ham bayramona tadbirlar davom etadi.

Barcha futbol muxlislarini futbol va bayramona marosimga taklif etib qolamiz! Yakshanba kuni stadionga keling va Superligaga yo‘llanma olgan sevimli «Dinamo» jamoamizni qo‘llab-quvvatlang!