Ҳаким Фузайлов мураббийлигида «Динамо» жамоаси Про лигада муддатдан аввал 2-ўринни нақд қилиб, икки йиллик танаффусдан сўнг Суперлигага йўлланма олди.

2021 йилги Про лиганинг сўнгги тури доирасида 21 ноябрь, якшанба куни соат 15:00да Самарқандда «Динамо» жамоаси Фарғонанинг «Нефтчи» клубини қабул қилади. Суперлига йўлланмасига эга чиқиб улгурган бу клублар ўртасидаги баҳсда «Динамо» жамоаси Фарғонадаги мағлубият учун «Нефтчи»дан реванш олиш ва мавсумнинг ёпилиш маросими олдидан мухлисларга байрамона муҳитни тақдим этиш имкониятига эга.

Самарқанд ва Фарғона клублари ўртасидаги ўйин олдидан «Динамо» жамоасининг Суперлигага йўлланма олгани муносабати билан «Динамо» марказий стадионида мухлисларга концерт дастури тақдим этилади. 21 ноябрь, якшанба куни соат 14:00дан стадионда санъаткорлар иштирокида чиқишлар режалаштирилган. Шу куни Про лига футбол мавсумининг ёпилиши маросими юқори даражада ўтказилиб, ўйиндан кейин ҳам байрамона тадбирлар давом этади.

Барча футбол мухлисларини футбол ва байрамона маросимга таклиф этиб қоламиз! Якшанба куни стадионга келинг ва Суперлигага йўлланма олган севимли «Динамо» жамоамизни қўллаб-қувватланг!