Gollandiyalik yarimhimoyachi Donni van de Bekning kelajagi sekin-asta oydinlashmoqda. Futbolchi qishki transfer oynasida “Manchester Yunayted”ni tark etishi mumkin, chunki u mankunianliklar tarkibida o‘z o‘rnini topa olmayapti. 

“Todofichajes” nashri ma’lumotlariga ko‘ra, Van de Bek faoliyatini Londonning «Arsenal» klubida davom ettirishi mumkin. Manbaning ta’kidlashicha, futbolchini ham ushbu variant qiziqtirmoqda. “Kanonirlar” avvalroq Donniga qiziqish bildirishgan va gollandiyalik futbolchi muzokaralar olib borishga tayyor.

Manbaga ko‘ra, van de Bek allaqachon “Yunayted” rahbariyatidan ushbu transferga yordam berishni so‘ragan.

Donni o‘tgan yozda “Manchester Yunayted”ga o‘tib, besh yillik shartnoma imzolagan edi. Uning hozirgi qiymati 25 million yevroga baholanmoqda.