O‘zbekiston kubogi yarim final bosqichi doirasida Olmaliqda bo‘lib o‘tgan AGMK va «Nasaf» jamoalari o‘rtasidagi o‘yin dramatik tarzda kechdi. Bahsda yuz bergan 5ta muhim voqeaga to‘xtalib o‘tamiz.
1-voqea.
Uchrashuvning 38-daqiqasida hakam mezbonlar darvozasi tomon penalti belgiladi. Husayn Norchayevning zarbasidan keyin to‘p to‘singa tegib, yuqoriga ko‘tarilib ketdi.
2-voqea.
Bahsning 61-daqiqasida "Nasaf" yarim himoyachisi Marko Stanoyevich Jokichga nisbatan qo‘polligi uchun maydondan chetlatildi.
3-voqea.
Qo‘shimcha bo‘limlarning dastlabkisi boshlangan paytda qarshiliklar burchak zarbasini o‘yinga kiritishdi. Himoyachi Alibek Davronov bosh bilan AGMK darvozasini ishg‘ol qilib, hisobni ochdi.
4-voqea.
Uchrashuvning 110-daqiqasida to‘p "Nasaf" himoyachisining qo‘liga tegdi. Ammo to‘p rekoshet holatida tabiiy holatda turgan qo‘lga tekkani uchun penalti belgilanmadi. Olmliqliklar keyingi hujumda to‘pni darvozaga joylashdi. Sanjar Shoahmedovning zarbasidan keyin to‘pga to‘rga borib tushdi. Ammo takroriy vaziyat shuni ko‘rsatdiki, ofsayd holatda turgan Sardor Rahmonov zarba berilayotgan paytda darvozabonning nigohlarini to‘sib qolgani uchun gol bekor qilindi.
5-voqea.
120+1-daqiqada "Nasaf" qarshi hujum tashkil qildi. Jo‘rabek Mannonov yakkama-yakka vaziyatga chiqib borgan bo‘lsa, darvozabon Valijon Rahimov o‘z jarima maydoni ichida uni yiqitdi. Ammo referi Rahimbek Karimov penalti belgilashga jazm etmadi. Darhol hujumga o‘tgan AGMK darvozani zabt etdi. Ahmadaliyevning zarbasidan keyin to‘p to‘rga borib tushdi. Biroq shundan so‘ng hakam videotakrorni tomosha qildi va golni bekor qilib, maydon egalari darvozasiga penalti belgiladi. Uni Kaluderovich aniq amalga oshirdi — 0:2.
Xato
Hakam qoidabuzarlik uchun Rahimov sariq kartochka berishi kerak edi. Darvozabonda bitta "sariq" borligini inobatga olganda, u maydondan chetlatilishi kerak edi. Shunda penalti paytida AGMK darvozasini o‘yinchi qo‘riqlashiga to‘g‘ri kelardi. Boisi, Mirjalol Qosimov barcha o‘zgarishlarni qilib bo‘lgandi.
"Nasaf" esa O‘zbekiston kubogi finaliga chiqdi. Ularga "Paxtakor" - "Bunyodkor" o‘yini g‘olibi raqiblik qiladi.
O‘zbekiston kubogi. Yarim final. 17:30.
«AGMK» - «NASAF» - 0:2 (0:0, 0:0, 0:1, 0:1)
Gollar: Alibek Davronov, 94 (0:1), Andriya Kaluderovich, 120+6 pen (0:2)
Noaniq penalti: Husain Norchayev, 38 («Nasaf», to‘sin)
Chetlatish: Marko Stanoyevich, 61 («Nasaf»)
