Coca Cola Superliga 26-turidan o‘rin olgan “Navbahor” – “Qo‘qon-1912” jamoalari o‘rtasidagi uchrashuv arafasida “lochinlar”ning 21 yoshli mahoratli hujumchisi Ibrohim G‘anixonov bo‘lajak o‘yin haqidagi fikrlari bilan o‘rtoqlashdi.

- “Navbahor” safiga yozgi transferlar davrida qo‘shildim va jamoa tarkibida “Qo‘qon-1912” (13-turdagi), “Turon” hamda “Andijon” jamoalariga qarshi kechgan bahslarda maydonga tushishga muvaffaq bo‘ldim. “Vodiy derbisi” o‘yinlari haqida eshitgandim va haqiqatdanam bunday uchrashuvlarning keskin hamda murosasiz kurashlar ostida o‘tishiga o‘zim bevosita maydonda guvoh bo‘ldim.

Bo‘lajak o‘yin joriy mavsumning so‘nggi bahsi bo‘lishi bilan birga “vodiy derbisi” hamdir. Shu bois, qo‘qonliklar ham ushbu uchrashuvda jamoamizga munosib qarshilik ko‘rsatishga intilishadi.

Shuning uchun bo‘lajak bahs shiddatli hamda murosasiz kurashlarga boy tarzda kechadi, degan umiddaman.

Jamoamiz so‘nggi uchrashuvlarda ijobiy natijalarga erishmoqda. Shuningdek, “Qo‘qon-1912”ni safarda (2:1) mag‘lubiyatga uchratgandik, bundan tashqari, 2-davradagi barcha derbi o‘yinlarida zafar quchdik. Mazkur o‘yinda ham ushbu g‘alabali an’anani davom ettirish niyatidamiz.

Bo‘lajak uchrashuvga jiddiy tayyorgarlik ko‘rdik hamda joriy mavsumni g‘alaba bilan, yaxshi kayfiyatda yakunlash niyatidamiz.

Mazkur o‘yinda stadionga tashrif buyuradigan ishqibozlarning bevosita ruhan va ma’nan qo‘llab-quvvatlashlari, madadi asosida maydonda to‘p tepib, muxlislarga quvonch ulashishga intilamiz hamda g‘alaba qozonish uchun barcha imkoniyatimizni ishga solamiz. Baxtimizga “Navbahor” ishqibozlari hamisha sog‘ bo‘lishsin", — dedi G‘anixonov.

“Navbahor” PFK matbuot xizmati.