Bugun ustoz sharhlovchi Mirzahakim aka To‘xtamirzayevning bir intervyucini ko‘rib o‘tirib muhim faktni aytganlari e’tiborimni tortdi va o‘sha davrni eslashga majbur etdi.

2014 yil, aprel oyi Yevropa Chempionlar ligasi yarimfinal javob o‘yinlari o‘tkaziladigan kunlar. Birinchi kungi yarimfinalni Mirzahakim aka va Murod aka sharhlashdi. Ertasiga ikkinchisini rahmatli Davlat aka va men sharhlashimiz kerak edi. Sharhlay olmadik. Translyasiya bekor qilindi, butunlay to‘xtatildi. Nafaqat Yevropa, balki boshqa ligalar ham efirdan olib tashlandi.

Demak, shu kun, ya’ni 2014 yil 30 apreldan O‘zbekistonda lisenziyasiz translyasiyalar butunlay tugatildi. Undan avval Ligalar va yirik kompaniyalar bu masalaga unchalik e’tibor qaratmasdi, telekanallar esa muxlislar manfaati yo‘lida chempionatlarni lisenziyasiz namoyish etardi. Boshqa tomonini o‘ylamasdik ham.

Tan olish kerak sohamiz uchun uyog‘iga ancha qiyin davr bo‘ldi. O‘zimiz ko‘nikkan va mazza qilib sharhlagan jahon futbolisiz qolganimiz, uni ustiga daromad kamaygani yetmaganidek, muxlislar tomonidan qattiq bosim bo‘lgan. Oradan mana 7 yil o‘tibdi, sport translyasiyalari to‘liq tiklandi. Endi hammasi rasmiy. Bir necha telekanallar muxlislar xohlagan barcha chempionatlarni ko‘rsatmoqda.

Shukur. 2014 yil 30 aprelga o‘xshash kunlar esa boshqa qaytmasin.

Davron Fayziyev.