O‘zbekiston kubogining 2021 yilgi finali ancha qiziqarli kechdi. Unda hakamlarning bahsli qarorlari, maydondan chetlatilish, bir kishi kam bo‘lib o‘ynagan jamoaning irodali g‘alabasiga guvoh bo‘ldik.

Bahsli qaror №1
"Nasaf" finalni ancha shiddatli boshlab, g‘alabaga bo‘lgan ishtiyoqi yuqori ekanini namoyish eta boshladi. Ammo uchrashuvning 34-daqiqasida hakam VAR yordamida bahsli qaror chiqardi. Oybek Bozorov o‘z oldida Alijonovni aldab o‘tish chog‘ida to‘pni to‘xtatdi, shunda butsasining uchi o‘sha joyga oyog‘ini uzatgan Hojiakbarning oyog‘iga tegib ketdi. Referi Risqullayev videotakrorni tomosha qilgach, "Nasaf"ning yetakchi futbolchisini maydondan chetlatdi.

Gol.
Oradan ko‘p o‘tmasdan "Paxtakor" chiroyli kombinasiya tashkil qildi. Sayfiyevning jarima maydoniga kirib ortga bergan uzatmasini Hamrobekov 14 metrlardan darvozasiga joylab qo‘ydi. Odiljon bu golni nishonlamadi.

Javob goli
"Paxtakor"ning golidan 4 daqiqa o‘tib "Nasaf" hisobni tenglashtirdi. Chap qanotdan Nasrullayev yetkazgan to‘pni Abdurahimov Azmiddinovdan o‘g‘irlab ketdi va yakkama-yakka vaziyatda darvozani ishg‘ol qildi.

Bahsli qaror №2
Birinchi taym yakunlanishiga yaqin Hamrobekov maydondan chetlatilishi mumkin edi. U ortdan kelayotgan qarshiliklar futbolchisining yuziga qo‘li bilan urdi. Risqullayev vaziyatni ko‘rib chiqib, sariq kartochka bilan cheklandi.

Irodali "Nasaf"
Ikkinchi bo‘limda qashqadaryoliklar ehtiyotkor o‘yin namoyish eta boshlashdi, ammo vaziyatlardan o‘ta unumli foydalanishdi. O‘yin tugashiga 15 daqiqa qolganida qarshiliklar burchak zarbasi ishlashdi. Burchakdan yetkazilgan uzatmani G‘olib G‘aybullayev bosh bilan darvozaga joylab qo‘ydi.

Ro‘ziqul Berdiyev jamoasi o‘yinning qolgan daqiqalarida yaxshi himoyalandi va g‘alabani ushlab qoldi. Shu tariqa, "Nasaf" o‘z tarixida ikkinchi marta O‘zbekiston kubogida g‘olib chiqib, Osiyo chempionlar ligasi yo‘llanmasini qo‘lga kiritdi.

O‘zbekiston kubogi. Final
"Paxtakor" – "Nasaf" – 1:2 (1:1,0:1)
Gollar: 28 - Xamrobekov (1:0), 38 - Abdurahimov (1:1), 75 - G‘aybullayev (1:2).
"Paxtakor" - Suyunov, Alijonov, Sayfiyev, Xamrobekov, Azmiddinov (Chobanov), Erkinov, Fayzullayev (Matich), Ismoilov, Sobirxo‘jayev (Izmailov), Temirov (Xolmatov), Hamdamov (Turg‘unboyev).
"Nasaf" – Ergashev, Abdurahimov (Akramov), Bozorov, Eshmurodov, G‘aybullayev, Mozgovoy, Nasrullayev,  Norchayev (Komilov), Nurulloyev (Davronov), Saitov, Turdialiyev (Rahmatov).
Qizil kartochka: 34 - Oybek Bozorov (Nasaf)