O‘tgan yozda Turinning “Yuventus” klubi asosiy yulduzini qo‘ldan chiqardi. Portugaliyalik futbolchi Krishtianu Ronaldu “Manchester Yunayted” bilan shartnoma imzolab, Angliya Premyer-ligasiga qaytdi.
“Oltin to‘p”ning besh karra sohibi jamoadan ketganidan keyin “keksa sinyora”da jiddiy inqiroz boshlandi. Massimiliano Allegrining shogirdlari hujum chizig‘ida katta muammolarni boshdan kechirmoqda. Jamoa A seriyaning 17 ta uchrashuvida bor yo‘g‘i 23ta gol urishga muvaffaq bo‘ldi. Hatto “Verona” va “Bolonya” turinliklardan ko‘ra ko‘proq gol urishdi.
Shu munosabat bilan “Yuventus” hujum chizig‘ini kuchaytirish ishlarini boshlab yubordi. “Bavariya”ning markaziy hujumchisi Robert Levandovski Turin klubi e’tiboriga tushdi, deya xabar beradi “Todofichajes” nashri.
Oldinroq polyak futbolchisi Myunxendan keyin Italiyaga ko‘chib o‘tishi mumkinligini tan olgandi.
Forvardning “Bavariya” bilan shartnomasi 1,5 yildan keyin yakuniga yetadi.
