Shu kunlarda yurtimiz bo‘ylab katta kurash bayrami o‘tkazilmoqda. O‘zbekiston kurash federasiyasi tomonidan 13-20 dekabr kunlari mamlakatimizda “Kurash haftaligi” e’lon qilindi. Joylarda haftalik doirasida kurash musobaqalari, seminarlar, uchrashuvlar tashkil etilishi belgilanib, bu orqali Prezidentimiz ilgari surayotgan g‘oya – sog‘lom turmush tarzini ommalashtirish, yurtdoshlarimizga o‘z qadriyatlariga hurmat ruhini singdirish, hamda kurash sporti bilan shug‘ullanuvchilar safini kengaytirish ko‘zda tutilgan.

E’tiborlisi, “Kurash haftaligi” doirasidagi bir qator sport musobaqalari tashkil etilmoqda. Jumladan, Toshkentdagi “Universal” sport majmuasida “Prokuratura polvoni” respublika turniri o‘tkazilib, g‘olib va sovrindorlar aniqlab olindi. Mazkur haftalikning ochilish marosimi ham tantanali ruhda o‘tkazilib, milliy urf-odatlarimiz, an’analarimizni o‘zida mujassam qilgan badiiy chiqishlarga boy bo‘ldi. Tadbirda so‘z olgan MOQ rahbari Rustam Shoabdurahmonov davlatimizning kurashni qo‘llab-quvvatlashga qaratayotgan e’tiboriga alohida to‘xtalib, musobaqa ishtirokchilariga omad tilab o‘tdi.

Bugun haftalik doirasida huquqni muhofaza qiluvchi organlar xodimlari o‘rtasida O‘zbekiston chempionati, 18 dekabrda talabalar o‘rtasida xalqaro turnir, 19 dekabrda esa “O‘zbek polvoni” respublika turniri hamda 20 dekabrda klublar o‘rtasida musobaqalar o‘tkazilishi rejalashtirilgan.

O‘zbekiston kurash federasiyasi matbuot xizmati xabariga ko‘ra, ushbu kurash musobaqalarining tizimli o‘tkazilishi natijasida mamlakatimizning ikki mingdan ziyod yoshlarini sport mashg‘ulotlari bilan qamrab olish ko‘zda tutilgan.