Ko‘tarinki kayfiyatda o‘tgan kattalar o‘rtasidagi jahon chempionatidan so‘ng poytaxtimizda IWF (Xalqaro og‘ir atletika federasiyasi) kongressi boshlandi. Unda tashkilotning ortda qolgan yildagi sarhisobi, yangi rejalar muhokama qilinmoqda.

Tadbir doirasida O‘zbekiston og‘ir atletika federasiyasi raisining birinchi o‘rinbosari, Osiyo og‘ir atletika federasiyasi vise-prezidenti, IWF Ijroiya qo‘mitasi vakili Shahrullo Mahmudov ham so‘zga chiqib, ortda qolgan JCH, og‘ir atletika sportining rivoji haqida fikr bildirib o‘tdi.

“Jahon chempionatini tashkillashtirishda va yuqori saviyada o‘tkazishdagi keng ko‘lamdagi ko‘mak uchun O‘zbekiston Respublikasi hukumatiga alohida tashakkur bildirmoqchiman. Dunyo og‘ir atletikasi – bitta katta oila. O‘zbekiston uning faol a’zosi. Shu ma’noda biz, sport turimizning rivoji yo‘lida doimo hamjihat bo‘lishni qo‘llab-quvvatlaymiz. Toshkentda hammamizga cheksiz hayajon baxsh etgan musobaqa, unda o‘rnatilgan yangi rekordlar, yangi jahon chempionlari, yangi iste’dodli sportchilarning kashf etilishi barchamizning g‘alabamizdir. Xalqaro og‘ir atletika federasiyasi Ijroiya qo‘mitasining keyingi keng qirrali faoliyatida, sport turimizning rivojida barchamiz hamjihat va yakdil ekanligimizni alohida ta’kidlayman”, – dedi SH.Mahmudov.

Shuningdek, Kongress doirasida IWFning vaqtinchalik rahbari Maykl Irani, Bosh kotib Muhammad Jalud ham so‘zga chiqib, Toshkentda o‘tgan dunyo birinchiligiga yuqori baho berishdi va ushbu sport istiqboli haqida o‘z fikrlarini bildirdilar. Tadbir davom etadi. Uning batafsil tafsilotlari bilan kelgusi materiallarimizda tanishtirib o‘tamiz.