«Lester» bosh murabbiyi Brendan Rojers Angliya liga kubogining chorak final bosqichi doirasida bo‘lib o‘tgan «Liverpul»ga qarshi o‘yin borasida o‘z fikrini bildirib o‘tdi. Eslatib o‘tamiz, "tulkilar" o‘yin davomida 3:1 hisobida oldinda borib, so‘nggi daqiqalarda ustunlikni qo‘ldan chiqarishdi. Penaltilar seriyasida esa Klopp jamoasi g‘alaba qozondi.

Rojersning aytishicha, birinchi bo‘limda ikkita gol urgan Jeymi Vardi tizzasidan olgan jarohat tufayli penaltilar seriyasida ishtirok etmadi. Hujumchi o‘yinning asosiy vaqtida jarohat olganiga qaramay, "Lester"da o‘yinchi almashtirish imkoniyati qolmagani uchun, maydonda qolgandi.

«Birinchi bo‘limda ajoyib o‘yin ko‘rsatdik va raqibga jiddiy xavf tug‘dirdik. «Enfild»ga kelib 3ta gol urish... Biz to‘rtta yoki beshta gol urishimiz ham mumkin edi. Ikkinchi bo‘limda bor kuchimizni berdik. G‘alabaga yaqin turgandik. Ammo 95-daqiqada gol o‘tkazib yuborish — alamli. Yigitlar uchun afsusdaman. Ular bu o‘yinga ko‘p kuch sarflashgandi», — dedi mutaxassis.