«Лестер» бош мураббийи Брендан Рожерс Англия лига кубогининг чорак финал босқичи доирасида бўлиб ўтган «Ливерпуль»га қарши ўйин борасида ўз фикрини билдириб ўтди. Эслатиб ўтамиз, "тулкилар" ўйин давомида 3:1 ҳисобида олдинда бориб, сўнгги дақиқаларда устунликни қўлдан чиқаришди. Пенальтилар сериясида эса Клопп жамоаси ғалаба қозонди.

Рожерснинг айтишича, биринчи бўлимда иккита гол урган Жейми Варди тиззасидан олган жароҳат туфайли пенальтилар сериясида иштирок этмади. Ҳужумчи ўйиннинг асосий вақтида жароҳат олганига қарамай, "Лестер"да ўйинчи алмаштириш имконияти қолмагани учун, майдонда қолганди.

«Биринчи бўлимда ажойиб ўйин кўрсатдик ва рақибга жиддий хавф туғдирдик. «Энфилд»га келиб 3та гол уриш... Биз тўртта ёки бешта гол уришимиз ҳам мумкин эди. Иккинчи бўлимда бор кучимизни бердик. Ғалабага яқин тургандик. Аммо 95-дақиқада гол ўтказиб юбориш — аламли. Йигитлар учун афсусдаман. Улар бу ўйинга кўп куч сарфлашганди», — деди мутахассис.