Aksariyat muxlislarimiz orasida muhokamalarga sabab bo‘layotgan va tushunmovchilikni keltirib chiqarayotgan mavzu, ya’ni, qishki transferlar oynasida “Navbahor” jamoasida amalga oshirilayotgan transferlar limiti mavzusiga to‘xtalsak.

2022 yilgi mavsumda O‘zbekiston Professional futbol ligasi tomonidan o‘tkaziladigan musobaqalar Reglamentida transfer oynasi davomida Superliga futbol klublari faqatgina 10 nafar yangi futbolchini ro‘yxatdan o‘tkazishlari mumkinligi belgilab qo‘yilgan va klublar bu haqda avvalroq rasman ogohlantirilgandi. O‘z navbatida, 2021 yilning 6 dekabr sanasiga qadar futbol klublarida istalgan miqdorda yangi futbolchilar bilan tuzilgan shartnomalarni ro‘yxatdan o‘tkazish imkoniyati mavjud edi. “Navbahor” PFK bu imkoniyatdan unumli foydalanib, 2021 yil 6 dekabrgacha 6 nafar yangi futbolchi bilan shartnoma imzolab, ularni O‘zPFL ro‘yxatidan o‘tkazgandi.

Qishki transferlar oynasi ochilganidan keyin, ya’ni 2021 yilning 6 dekabridan to hozirgacha “Navbahor” 4 nafar yangi futbolchi bilan kelishuvga erishdi. Demak, hozirga kelib, jamoamiz yana 6 nafar yangi futbolchi bilan shartnoma tuzish imkoniyatiga ega. Shu bois, “Navbahor” limiti tugab qoldi”, deya noo‘rin xavotirga tushayotgan muxlislarimizdan xotirjam bo‘lishlarini so‘rab qolamiz. Jamoamizda seleksiya ishlari va yangi futbolchilar bilan muzokaralar davom etadi.

Qo‘shimcha ma’lumot sifatida keltirish joizki, 2022 yilgi mavsumda O‘zbekiston Professional futbol ligasi tomonidan o‘tkaziladigan musobaqalar Reglamentiga muvofiq, limitdan tashqari holatda futbol klublari 2021 yilgi mavsumda jamoa sharafini himoya qilgan ayrim futbolchilar bilan shartnomalarni uzaytirishlari yoki o‘zlarining U-18 jamoalaridan cheklanmagan miqdorda yosh iqtidorlarni asosiy jamoaga taklif etishlari mumkinligi belgilangan. Shuningdek, 2000 yil va undan keyin tug‘ilgan futbolchilar bilan yangi shartnomalar ham limitdan tashqari ro‘yxatdan o‘tkaziladi.

“Navbahor” PFK matbuot xizmati.