O‘zbekiston zamonaviy beshkurash federasiyasi bosh kotibi, O‘zbekiston polo federasiyasi raisi o‘rinbosari Kseniya Gulyamova Xalqaro zamonaviy beshkurash ittifoqi (UIPM) ijroiya qo‘mitasi qaroriga ko‘ra, 2024 yilgacha bo‘lgan muddatga qadar UIPM Xotin-qizlar qo‘mitasi a’zosi etib tayinlandi.

Oldinroq hamyurtimizning nomzodi UIPM prezidenti, doktor Klaus Shormann tomonidan tashkilot Ijroiya qo‘mitasi tomonidan ko‘rib chiqishga tavsiya qilingan edi.

Eslatib o‘tamiz, 2021 yil 27-28 noyabr kunlari o‘tkazilgan UIPMning onlayn Kongressida O‘zbekiston zamonaviy beshkurash federasiyasi tomonidan xalqaro tashkilot qoshida Xotin-qizlar qo‘mitasini tuzish g‘oyasi ilgari surilgan edi.

Bundan ko‘zlangan maqsad - sportchilar, trenerlar, hakamlar va sport federasiyalari rahbarlari orasida gender tengligini ta’minlashdan iborat. Ta’kidlash kerak, UIPM qoshida Xotin-qizlar qo‘mitasini tuzish taklifini onlayn Kongress ishtirokchilarining 95 foizi qo‘llab-quvvatladi.