Krishtianu Ronaldu bilan xayrlashish «Yuventus»ga maoshlar borasida pulni tejash imkonini berdi, biroq bu o‘yin va natijalar bobida jamoa holatiga salbiy ta’sir qildi.
Dastlabki 20 o‘yinda atigi 28 ta gol urgan jamoa 1999/2000 yildan buyon eng yomon natijani qayd etdi.
Boshqacha aytganda, «keksa sinyora» XXI asrda hech qachon bunday zaif hujum chizig‘iga ega bo‘lmagan.
Turinliklar bungacha 18 ta gol o‘tkazib yuborishdi va turnir jadvalida beshinchi o‘rinni band etishgan.
Yana bir muammo shundaki, jamoada aniq bir yetakchi va to‘purar yo‘q. Paulo Dibala va Alvaro Moratalarning har biri beshtadan gol urgan - bu jamoadagi barcha futbolchilar orasida eng yuqori ko‘rsatkichdir.
Eslatib o‘tamiz, Ronaldu o‘tgan mavsum 20 ta o‘yinda 15 ta gol urgan edi. «Yuventus»da oxirgi marta bunday xavotirli holat 1987/1988 yilgi mavsumda yuzaga kelgan bo‘lib, o‘shanda 20 turdan keyin Yan Rash va Marino Magrin to‘rttadan gol urishgan edi.
