«Manchester Yunayted» hujumchisi Krishtianu Ronaldu jamoani tark etishi mumkin, deb xabar bermoqda Sport.es.

Manba bergan xabarga ko‘ra, portugaliyalik jamoadagi vaziyatdan charchagan va «Manchester Yunayted» rahbariyatidan norozi. Ronaldu o‘zining agenti Xorxe Mendeshga vaziyat o‘zgarmasa, yangi jamoa izlash kerakligini aytgan.

Mendesh «Barselona»ning hozirgi rahbariyati bilan yaxshi munosabatlarda va Ronalduning xizmatlarini kataloniyaliklarga taklif qilishga tayyor. «Barselona» bosh murabbiyi Xavi yangi hujumchi sotib olmoqchi ekani inobatga olinsa, klub Ronaldu variantini ko‘rib chiqishi haqiqatdan yiroq emas.

Ronaldu Angliya Premyer Ligasining 2021/22 yilgi mavsumida 16 ta o‘yin o‘tkazib, 8 ta gol va 3 ta golli uzatmaga mualliflik qildi. «Qizil iblislar» APL turnir jadvalida 7-o‘rinda bormoqda. Ralf Rangnik shogirdlari 19 uchrashuvda 31 ochko to‘plagan, jamoa 2 ta ko‘p o‘yin o‘tkazgan peshqadam «Manchester Siti»dan 22 ochkoga ortda qolmoqda.