«Nyukasl» klubi navbatdagi transferni amalga oshirdi. Klub Kris Vudni 30 million yevroga sotib oldi.

“Nyukasl”ni arablar sotib olgani, jamoa yaqin yillarda top klubga aylanish ambisiyasiga ega ekani, tranfser bozorida katta yulduzlarga xaridor bo‘la boshlagani yangilik emas. Ammo avvalo, buning uchun APLda qolishni eplash kerak. Buning uchun “Nyukasl” hoziroq yaxshi futbolchilarga muxtoj, kelajak uchun emas, aynan bugun jamoani kuchaytirish uchun yoshi kattaroq bo‘lsa ham, Kiran Tripye yoki Kris Vud kabi futbolchilarga murojaat qilayotganini tushunsa bo‘ladi.

Lekin transfermarketdagi narxi atigi 6 million bo‘lgan va bu mavsumda atigi 3 gol urgan Kris Vudni (Vud ingliz tilida “taxta” degan ma’noni beradi va u aynan shu tipdagi hujumchi) 30 million yevroga sotib olish? Qachondir, balkim kelasi yil “Nyukasl” Angliyada yevrokuboklar uchun kurashadigan, tarkibida shunga mos top-futbolchilar bo‘ladigan jamoaga aylansa, oldingi chiziqda Kris Vudning yugurib yurishini tasavvur qila olasizmi?

Ha, “Nyukasl”ga hujumchi kerak. Ayni damda jamoa APLda qolish uchun kurashishi uchun. Kallum Uilsonning jarohati ham hujumchiga ehtiyoj yaratdi. Aytilishicha, “Nyukasl”ga yanvar transferlari uchun 50 million funt ajratilgan va klub bu pullarni Tripye va Vud uchun deyarli sarflab bo‘ldi.   

Balkim “Nyukasl” rahbarlariga futbolda “ijara shartnomasi” degan amaliyot ham borligini eslatib qo‘yish kerakdir? Jamoani vaqtincha kuchaytirib, bu mavsumdagi asosiy maqsad uchun yordam beradigan o‘nlab futbolchilar borki, ular Kris Vuddan zo‘r va tabiiyki, ijara sistemasida arzonroqqa tushgan bo‘lardi.

Ayniqsa, JCH o‘tkaziladigan davrda zaxirada qolayotgan yulduzlarni jalb qilish osonroq kechadi. Misol uchul Olivye Jiru. APLda sinalgan, hozir esa, "Milan"da butun mavsum bo‘yicha atigi 7 o‘yinda asosiy tarkibda maydonga tushdi. Va hokazo.

Qahramon Aslanov.