Bugun poytaxtimizdagi «Cinema Palace» kino saroyining kichik zalida (sobiq «Panorama» kinoteatri) o‘zbek boks maktabining asoschisi Sidney Jakson xotirasiga bag‘ishlangan hujjatli filmning premyerasi bo‘lib o‘tdi. Tadbir O‘zbekiston Respublikasi Turizm va sport vazirligi, «Milliy PR-markaz» DUK hamkorligida tashkil etildi.
Hujjatli film premyerasida Turizm va sport vazirligi, Milliy Olimpiya qo‘mitasi, O‘zbekiston boks federasiyasi vakillari, Sidney Jaksonning qizi Paina Jakson va uning yaqinlari, Respublika olimpiya zaxiralari kolleji trener-pedagoglari, o‘zbek boksi faxriylari hamda ommaviy axborot vositalari xodimlari ishtirok etishdi.
Tadbirni Turizm va sport vazirining birinchi o‘rinbosari Ulug‘bek Azamov kirish so‘zi bilan ochib berdi. Shuningdek, taqdimot marosimida AQSHning O‘zbekiston Respublikasidagi favqulodda va muxtor elchisi, janob Daniyel Rozenblyum ham ishtirokchilarga videomurojaat shaklida qutlov yo‘lladi.
E’tirof etish joiz, o‘zbek boks maktabi bugun butun dunyoga ma’lumu-mashhur. Sportchilarimiz xalqaro sport maydonlarida O‘zbekiston sha’ni va qudratini munosib himoya qilib, yangi g‘alabalarni qo‘lga kiritib kelishmoqda. Bahodir Jalolov, Hasanboy Do‘stmatov, Shaxram G‘iyosov, Murodjon Axmadaliyev, Shahobiddin Zoirov kabi charm qo‘lqop ustalari o‘zbek boksining yangi avlod yulduzlari sanaladi. Ular erishayotgan yutuqlar zamirida murabbiylarning mashaqqatli va beqiyos mehnatlari yotibdi, desak mubolag‘a bo‘lmydi. Zero, har bir sportchining g‘alabasi aslida ustozining ham g‘alabasi, muvaffaqiyatidir.
Bokschilarimizning bugungi muvaffaqiyatlari zamirida o‘zbek boks maktabi asoschisi, atoqli amerikalik murabbiy Sidney Jaksonning xizmatlari katta. Shu bois Turizm va sport vazirligining tashabbusi va bevosita ko‘magi bilan aynan shu inson xotirasiga bag‘ishlangan hujjatli film yaratildi.
«Sidney Jakson fenomeni» nomli hujjatli filmi «Shayxontohur-film» kinostudiyasi tomonidan «Orient Finans bank» va «Golden House»ning mualliflik huquqini taqdim etishi asosida Turizm va sport vazirligi bilan hamkorlikda tasvirga olindi. Filmning ssenariy muallifi va prodyuseri Boris Babayev, rejissyor – Navruza Biynazova.
Hujjatli filmda afsonaviy murabbiyning O‘zbekistondagi hayot yo‘li va faoliyatining ko‘plab muhim sahifalari haqida uning qizi, hozir Toshkentda istiqomat qiluvchi Paina Jakson so‘zlab bergan. Shuningdek, film taqdimotida O‘zbekiston Respublikasi Bosh vazirining o‘rinbosari – turizm va sport vaziri Aziz Abduxakimov, O‘zbekiston boks federasiyasi raisi maslahatchisi Malik Babayev, O‘zbekiston milliy terma jamoasi bosh murabbiyi Marat Qurbonov, Sidney Jakson shogirdlari – boks afsonasi Rufat Risqiyev, boks faxriylari Mirsolih Sagatov, Rinat Yusupov va boshqalar ishtirok etishdi.
Manba: Turizm va sport vazirligi matbuot xizmati
