Xabaringiz bor, transfer oynasi davrida andijonlik Usmonali Ismonaliyev “Bunyodkor” bilan ikki yillik shartnomaga imzo chekdi. Biz yarim himoyachining fikrlari bilan qiziqdik.

- “Bunyodkor”ga bosh murabbiy Shuhrat Maqsudovning taklifiga ko‘ra keldim. Dekabr oyida Shuhrat Mirusmonovich bilan uchrashib, og‘zaki tarzda gaplashib olgan edik. Yangi yildan so‘ng mashg‘ulotlarga qo‘shildim va ko‘p o‘tmay jamoa bilan ikki yillik shartnomaga imzo chekdim.

“Bunyodkor” bilan ikki yillik shartnomaga imzo chekkanimning boisi, inson bir yilda barcha ko‘zlagan maqsadiga erisha olmasligi mumkin. Ikki yil esa, yetarli muddat. Shuni inobatga olgan holda keyingi ikki yillik hayotimni "Bunyodkor" bilan bog‘ladim. Nasib qilsa, navbatdagi ikki mavsumda o‘zimni ko‘rsatib, jamoa g‘alabalariga hissa qo‘shgan holda muxlislarimizni xursand qilamiz, degan umiddaman.

To‘g‘ri, mavsumlar oralig‘ida jamoani ko‘p futbolchilar tark etdi. Shunday bo‘lsa-da, tarkibimizda yaxshi o‘yinchilar bor. Ichki muhit alo darajada. Shuning uchun yangi jamoamga moslashishda qiyinchilikka duch kelganim yo‘q. Bu tomondan umuman muammo bo‘lishi mumkin emas.