"Qo‘qon-1912" jamoasining Toshkentdagi o‘quv-yig‘in mashg‘ulotlari tobora o‘z yakuniga yetib bormoqda. Baxtiyor Ashurmatov boshchiligida futbolchilar kuniga ikki mahaldan mashg‘ulotlarda ishtirok etishyapti. Jamoa tarkibini mukammallashtirish uchun murabbiylar shtabi seleksiya ishlarini to‘xtatishgani yo‘q.
Jamoaning asosiy o‘zagi saqlanib qolindi. Yetakchi futbolchilar Murod Xolmuhammedov, Aleksandr Merzlyakov, Muzaffar Abdullayev, Oybek Rustamov, Sardor Azimovlar bilan birga Quvondiq Ro‘ziyev , Bilolxon Toshmirzayev, San’at Shixov kabi futbolchilar mashg‘ulotlarda astoydil ishlashmoqda. Jamoa mashg‘ulotlariga o‘tgan mavsumni Bekobodning "Metallurg" jamoasida o‘tkazgan hujumchi Shahzodbek Nurmatov qo‘shilgan. Jamoa ko‘rigida bo‘lib turgan Islomjon Toshpo‘latov yana Termizning "Surxon" jamoasiga qaytib ketdi.
O‘tgan mavsumda jamoa to‘purari bo‘lgan Serbiyalik himoyachi Ivan Yosovich bugun Belgrad-Istanbul-Toshkent yo‘nalishi bo‘yicha yo‘lga chiqdi. Yosovich ertaga jamoa ixtiyoriga yetib keladi.
