O‘zingizga ma’lum,“Nasaf” so‘nggi o‘n yillikda Ro‘ziqul Berdiyev bilan ko‘plab sovrinlarni qo‘lga kiritdi. Ro‘ziqul Sa’dullayevich ham “Nasaf”dagi faoliyati davomida “O‘zbekistonda xizmat ko‘rsatgan yoshlar ustozi” davlat mukofoti bilan taqdirlandi, O‘zbekistonning 5 karra eng yaxshi murabbiyi deb topildi.
“Nasaf” Ro‘ziqul Berdiyev murabbiyligi davrida O‘zbekiston chempionatining to‘rt marta brozna medallarini, ikki marta kumush medallarini, ikki marta O‘zbekiston Kubogini va bir marta O‘zbekiston Superkubogini qo‘lga kiritdi. 2021 yilgi futbol mavsumida asosan “Nasaf” futbol maktabi tarbiyalanuvchilaridan tarkib topgan jamoa bilan OFK Kubogi finaligacha yetib bordi.
Yangi mavsumda o‘z oldiga jiddiy maqsadlarni, xususan O‘zbekiston Superkubogi, O‘zbekiston chempionligini, O‘zbekiston kubogini qo‘lga kiritish hamda xalqaro maydonlarda vatanimiz sharafini munosib himoya qilishga bor e’tiborini qaratayotgan “Nasaf” futbol klubi rahbariyati Ro‘ziqul Berdiyev bilan ikki yillik shartnoma imzoladi.
Ro‘ziqul Berdiyev 2023 yilning so‘ngiga qadar jamoa bosh murabbiyi lavozimida faoliyat olib boradi.
