Xabaringiz bor, joriy yilning iyun oyida mamlakatimizda futbol bo‘yicha 23 yoshgacha futbolchilar o‘rtasida Osiyo kubogi o‘yinlari bo‘lib o‘tadi.

Qit’amizning nufuzli musobaqasini yuqori saviyada o‘tkazish maqsadida O‘zbekiston futbol assosiasiyasi tomonidan bir qator ishlar amalga oshirilmoqda. Ma’lumki, qit’a birinchiligining bir qator uchrashuvlariga viloyatimizdagi “Markaziy” stadion mezbonlik qiladi. Bugun O‘FA vise-prezidenti Odil Ahmedov boshchiligidagi ishchi guruh viloyatimizga tashrif buyurdi. O‘FA ishchi guruhiga safar davomida Namangan viloyat turizm va sport bosh boshqarmasi hamda Namangan viloyat futbol assosiasiyasi rahbariyati va xodimlari hamrohlik qilishdi.

Ishchi guruh vakillari tashrif chog‘ida viloyatimizda terma jamoalar uchun yaratilgan sharoitlar, mehmonxonalar va mashg‘ulotlar o‘tkaziladigan stadionlarni ko‘zdan kechirishdi.  Mehmonlar dastlab viloyatimizdagi “Oydin plaza”, “Shedevr”, “Axsikent”, “Namangan-S” mehmonxonalaridagi sharoitlar bilan yaqindan tanishishdi.

Shuningdek, O‘FA ishchi guruhi terma jamoalarning mashg‘ulotlari va rasmiy uchrashuvlari o‘tkaziladigan Uychi tumanidagi  “Paxtakor”, Namangan shahridagi “Dinamo”,  “Markaziy” stadion zaxira maydonida yaratilgan sharoitlarni ko‘zdan kechirib, mavjud kamchiliklarni bartaraf etish bo‘yicha kerakli maslahatlarni berishdi.  

O‘FA vise-prezidenti Odil Ahmedov boshchiligidagi ishchi guruhining viloyatimizdagi “Markaziy” stadion va zaxira maydoni bilan tanishish jarayonida mehmonlarga  Namangan viloyat turizm va sport bosh boshqarmasi, Namangan viloyat futbol assosiasiyasi rahbariyati va xodimlari bilan birgalikda “Navbahor” futbol klubi hamda “Markaziy” stadion rahbarlari, jumladan, “Navbahor” PFK prezidenti Otabek Samatov, klub sport direktori Akmal Sohibov, “Markaziy” o‘yingoh direktori Nabixon Abdug‘aniyev hamrohlik qilishdi.